白蘭特坐正 荷蘭吞「冰」下火

猪拉多纳

「白蘭特號」正式啟航！歐國外戰火重燃，A組名牌荷蘭火併冰島，名宿白蘭特擔正後首度領軍當然要打響頭炮，適逢雙星尹佩斯同史奈達新季鹹魚翻生，加上「橙衣兵團」歷來喺主場出擊例炒冰島，今鋪撐硬荷蘭1.72倍「讓主」。

（有線61及201周五凌晨2:45直播）
尹佩斯 史奈達齊翻生

7月上任嘅白蘭特，將聯同雲尼斯達萊同雲巴士頓兩位星級副手領導荷蘭，呢支歐洲傳統勁旅暫時喺A組排第3，落後榜首兼今仗對手冰島5分，要爭直接出線資格不容再失。新帥白蘭特執掌第一擊即刻有運行，翼鋒洛賓傷愈，新星迪比轉投曼聯後迅速上位，加埋雙星尹佩斯及史奈達「歸位」，絕對係荷蘭一大喜訊。

上季狀態下滑嘅史奈達，今季為加拉塔沙雷喺季前熱身賽頻頻「士哥」；尹佩斯轉戰費倫巴治後亦火速重拾射門鞋，連續喺歐洲賽同土超戰場數胡。兩大攻擊重心重新撻着，荷蘭火力毋庸置疑。翻查往績，荷蘭近5次主場鬥冰島贏晒，當中次次都贏最少兩球以上，加上冰島教頭拿格碧克昔日帶領瑞典鬥荷蘭未贏過（2和1負），兩大數據都有利「橙衣兵團」。
近5次主場贏晒冰島

冰島堪稱今屆歐國盃外圍賽驚喜球隊，但連場佳績已令荷蘭有所防範，白蘭特賽前稱話有一套針對性部署，仲揚言會繼續大打433進攻陣式，做足功課之餘又矢志大打進攻足球，擺明對3分志在必得。冰島於去年10月喺首循環爆冷以2:0造低荷蘭，今鋪肯定心雄想再剃荷蘭眼眉，「唔識死」鬥攻隨時輸得更大鑊。