英格蘭劏魚腩手起刀「諾」

猪拉多纳

朗尼爭破卜比Sir士哥紀錄
英格蘭要贏波賀朗尼「登基」！「三獅兵團」今晚喺歐國盃外圍賽E組作客鬥魚腩聖馬力諾，贏波提早攞決賽周入場券肯定冇問題，焦點所在係隊長朗尼可唔可以打破由卜比查爾頓保持嘅入球紀錄，以英格蘭6戰全勝嘅強勁氣勢兼入波決心嚟睇，要大炒聖馬力諾唔係難事，-5都照捧2.25倍「讓球客勝」！
（有線61及201周日凌晨0:00直播）
贏波即殺入決賽周
英格蘭喺上年世界盃表現令人失望，幸好今次喺歐國盃外圍賽就好威水，6場全勝兼且轟入18球。「三獅兵團」依家領先第3位嘅斯洛文尼亞9分，而且之前兩次對賽都贏晒，所以今晚只要贏波就肯定躋身明年決賽周。出線幾乎冇難度，成Team人嘅目標就係「幫」朗尼入多幾粒，呢位射手對上5場外圍賽都有入波，依家累積喺國際賽轟入48球，只差1球就追平卜比查爾頓嘅49球紀錄，今場對住魚腩聖馬力諾，肯定搏命力爭省多幾粒做「士哥王」啦！
聖馬力諾今屆守齋
查實除咗朗尼之外，英格蘭今次有唔少「新血」都要爭取表現，占美華迪、舒維爾想留低肯定要施展渾身解數，史達寧、阿歷士張伯倫、哈利卡尼同禾確特亦要喺國際賽證明自己。以生牯仔為主嘅「三獅兵團」個個心入面都有團火，有機會大炒你慌唔去到盡咩？
對手聖馬力諾堪稱「歐洲首席魚腩」，連「新丁」直布羅陀今屆外圍賽都入過波，反而聖馬力諾係今屆唯一「零」入波嘅國家隊，相信英格蘭可以無後顧之憂咁狂攻。仲有一點值得一提，「三獅兵團」對上3次對聖馬力諾，每場都贏至少5球，今場又點會贏得少呀？
英格蘭對賽最少贏5粒
‧聖馬力諾兩次主場鬥英格蘭，分別輸1:7同0:8。
‧雙方5次交手，「三獅兵團」全部至少贏5粒。
‧英格蘭連續10場作客未輸過。