意大利精打細算勒住踢

猪拉多纳

歐國盃外圍賽H組意大利主場對保加利亞，意軍鋒線人才凋零，成績每況愈下，上仗對馬爾他即使佔盡上風，但只能小勝1比0，加上球隊出線形勢不俗，今仗唔慌會急於主攻。保加利亞處於青黃不接低潮，過去兩次到訪意大利都食白果。意大利1.3倍主W乏味，最好揀1.72倍入球細。

（有線61及201台周一凌晨2時45分直播）

自從韋利、恩沙基、托迪嘅年代過去後，加上巴神唔生性，意大利鋒線後繼無人，領隊干地上仗以巴西歸化兵艾達馬田斯，夥拍加比亞甸尼、加斯安奴柏利打三前鋒，但火力仍然唔夠，全場十七次射門只入一球，把握力極低。球隊仍靠三十六歲老將派路支撐大局，連續兩輪比賽緊密進行，真係難為呢位老人家，今場隨時踢唔足全場。由於兩支爭出線勁敵克羅地亞同挪威今晚互撼，點都有會一隊失分，因此意大利出線前景樂觀，未必搏到盡。
保加利亞谷唔起

保加利亞上仗0比1不敵挪威之後，已落後第三位挪超五分，出線機會愈來愈低。事實上，自從貝碧托夫退出國家隊後，呢支東歐球隊一直欠缺領軍人物，現時靠晒効力莫斯科斯巴達嘅前鋒艾夫連波波夫搵食，呢位球員級數有限，難以威脅保方十指關，預料悶戰格局捧細啱數。