伯頓聯賽踩油勝算高

猪拉多纳

呢個禮拜雖然踢歐國盃，但二線聯賽仍然有波打，英甲同英乙今晚都有直播賽事。英甲升班球隊伯頓開季表現唔錯，現時位佔前列，球隊早前雖喺英錦標出局，但反而令球隊更專心聯賽，今仗主場面對近況回落嘅高雲地利，絕對可以高奏凱歌，讓球盤伯頓小讓平半捧上盤。

（TVB 301周日晚9時30分直播）

今季由英乙升班嘅伯頓，喺前荷蘭國腳哈索賓基帶領下成為英甲一路奇兵，球隊喺聯賽五戰四勝一和排喺前列位置。伯頓雖然喺早前嘅英聯盃同英錦標出局，但球隊喺法定時間都同對手打和，表現其實唔差。阿King覺得伯頓喺盃賽出局算係好事，因為佢哋可以專心應付聯賽爭取好成績，今仗雖有前鋒達里斯查理斯與翼鋒艾斯美唔踢得，但主場出擊贏波機會甚高。

高雲地利開季取得聯賽三連勝後近況回落，最近兩場聯賽都贏唔到，而且失波仲好多，已經連續三場英甲賽事都畀對手攻入兩球。高雲地利今仗仲有中場占士麥迪臣因足踝受傷要長抖，另一後防佐敦韋利士同樣因傷倦勤，今仗作客受讓平半都要唔過。
牛津聯穩陣波吼半場和

英乙布里斯托流浪主場對牛津聯，布里斯托流浪早前曾錄得三連勝，但上場作客輸畀奧連特令連勝終止，士氣難免受影響，球隊雖有前曼城青年軍阿當德尼喺轉會窗關閉前加盟，今場相信可以披甲，但右閘丹尼爾列比達仍受傷患困擾，今仗主場出擊都未必會踢得進取。牛津聯開季聯賽兩勝三和未輸過，由於後衞森朗治因足踝受傷缺陣，今仗作客相信都會踢得較穩陣，阿King推介半場和。

（TVB 301周日晚7時15分直播）