意大利欠霸氣「讓和」啱數

猪拉多纳

歐國盃外圍賽H組賽事，意大利今晚主場迎戰保加利亞，兩隊波嘅入球能力都好令人懷疑，意大利上場對住弱旅馬爾他都只係小勝1:0，完全冇晒頂級勁旅嘅霸氣，保加利亞更加係蜀中無大將，今場水鬥水隨時係悶戰一場，「藍衫軍」煲魚生粥機會極高，一於玩3.25倍「讓球和」。

（有線61及201、中央5台周一凌晨2:45直播）

意大利近年青黃不接，尤其前鋒線已經搵唔到世界級球員壓陣，所以畀AC米蘭放逐嘅艾沙拉維、踢修咸頓嘅加斯安奴柏利都要夾硬擔大旗，最慘係連狀態大勇嘅基奧雲高都因傷退埋隊。好在以一班老將保方、基亞連尼、派路同馬高華拉堤等組成嘅中後場依然硬淨，守強攻弱相當明顯，所以就有分組賽兩戰馬爾他都係小勝1:0嘅尷尬場面。
保加利亞反抗乏力

今場比賽安排喺西西里城市巴勒莫舉行，意大利之前8次喺呢個地方比賽贏咗7次，對上次兵敗巴勒莫，已經係21年前嘅事，意軍喺「福地」出擊有機會贏波，睇意大利近兩次主場對保加利亞分別贏1:0同2:0，今場都係小勝居多。

保加利亞上仗主場0:1輸畀挪威後，球員喺主隊球迷噓聲中離場，信心跌到落谷底，而且自從貝碧托夫退出後，國家隊已經冇值得信賴嘅「士哥拿」，最叻仔嘅艾夫連波波夫都只係得10個國際賽入球，今場作客意大利只求減少失波，唔好輸得太樣衰，仲點有能力入波吖！