國足擺大個頭盡數

猪拉多纳

今晚世盃外圍賽亞洲區C組賽事，啱啱畀香港守和嘅中國，將於瀋陽「名義上作客」迎戰弱旅馬爾代夫。國足上仗狂攻都炸唔散港隊防線，被內地傳媒插到體無完膚，谷埋成肚火，據報主帥比連會變陣出擊，改派FC廣州前鋒郜林掛帥加強火力，適逢馬爾代夫心雄唔擺鐵桶陣，國足誓搵呢件不自量力嘅魚腩祭旗，讓球客勝「-3」也值得捧場。

（廣東體育及中央5台周二晚7時35分直播，馬會網上文字直播）

香港上仗守和中國表現超水準，但不乏幸運之神眷顧，包括橫楣門柱四度「幫忙」，換句話講全場狂轟猛炸嘅國足演出唔算差。當然成績大過天，堂堂中國竟然贏唔到「細佬」實在顏面何存，惹來全國鋪天蓋地圍插。不過，由於今仗對手馬爾代夫嘅主場草地嚴重受損，國際足協早前決定將賽事移師到中國瀋陽舉行，無喇喇由作客變主場，國足未開波已先贏地利。
郜林于大寶前線搏殺

國足主帥比連上仗以于大寶打單箭頭，表現麻麻，同時冇換入郜林亦成為「罪狀」之一。有指比帥會從善如流，今仗打算起用郜林拍住于大寶於前線掛帥，呢位FC廣州前鋒今季喺中超入咗十二粒，唔單止排射手榜第四，亦係最多士哥嘅中國球員，有佢披甲相信能加強前線嘅把握力，加埋武磊、鄭智、于漢超、鄭龍等後上支援，火力全開唔嘢小，據報國足呢兩日係咁練射波，誓要一洗對港隊時久攻不下嘅困局。

馬爾代夫一向都係冇骨魚腩，但勝在識得擺鐵桶陣頑抗，之前兩場世盃外不敵卡塔爾同香港僅失三球，當中首仗去到補時第九分鐘先被卡塔爾攻陷，證明佢哋立心死守效果唔曳。不過馬爾代夫主帥馬富斯賽前語出驚人，話日前同菲律賓「拍跳」雖輸兩粒，但冇玩龜縮表現唔錯，暗示今仗對中國唔擺鐵桶陣，不自量力盞衰多兩錢重。
搶得失球力爭大勝

事關國足除咗落後打多一場嘅香港一分，與次席嘅另一勁敵卡塔爾相比，得失球差更被甩開十球，若果鬥到最後同分要計得失球的話，國足非常輸蝕，難得撞正唔玩死守嘅馬爾代夫，國足勢必盡情數胡，讓球客勝咪錯過。