狂牛軍團「細」破鐵桶陣

猪拉多纳

馬其頓泊大巴

上場以2:0打敗斯洛伐克嘅西班牙，今晚又再出戰歐國盃C組外圍賽，作客榜尾馬其頓。不過雷法爾唔睇好「狂牛軍團」可以大數對手，皆因呢支衞冕冠軍欠缺一位得分穩定嘅士哥拿，你睇佢哋近6場比賽夾埋入得6球就知要唔過。咁嘅情況下想攻破對方嘅鐵桶陣一啲都唔容易，都係捧2.19倍細盤好過。

（有線62及202、中央5台周三凌晨2:45直播）

先簡單講吓C組形勢，隨住西班牙上仗打斷斯洛伐克外圍賽6連勝氣勢，家陣「狂牛軍團」憑住對賽成績優勢，反壓同得18分嘅後者暫列榜首，並僅以3分之差拋離第3位嘅烏克蘭，形勢可謂非常緊湊。邊隊喺餘下嘅賽事失準，就好大機會要踢附加賽。所以即使馬其頓實力一般，相信西班牙都唔會掉以輕心。
西班牙前鋒死晒火

之不過咁，西班牙好前鋒近年買少見少，無論洛蘭迪定艾華路莫拉達都唔啱主帥迪保斯基心水。至於由巴西手上搶贏嘅迪亞高哥斯達，則遲遲都夾唔到隊波，至今上陣8次只係入得1粒咁大把，點到西班牙唔死火先。就算迪帥開到聲撐佢，希望提升佢嘅信心，都無助改善西班牙嘅入球能力。

至於上仗畀球迷狂噓嘅守將碧基，畀人影到佢賽後去咗希洪1間夜店蒲，唔少球迷喺佢走嗰陣都鬧佢飲大咗。好在「狂牛軍團」嘅防守依然信得過，佢哋連續5場外圍賽都保持不失。啱啱攞到第100頂喼帽嘅門將卡斯拿斯，亦要把握隊友迪基亞畀曼聯雪藏，欠缺比賽狀態上陣嘅機會，騷哥利話畀球迷同領隊迪保斯基聽，自己先係西班牙冧巴溫門神。

至於對手馬其頓，自從射手彭迪夫退役後，就再冇球員夠料擔大旗。佢哋上仗仲衰到作客輸畀歐洲知名魚腩盧森堡0:1，直接跌落榜尾位置，今仗回師主場點都要做番出好戲同國民交代，實行泊大巴輸少1球得1球。