鹿角半場速食丙組仔

猪拉多纳

經過兩輪國際賽期後，今日賽事以二線波為主，其中頭輪日本天皇盃第二圈賽事，日職次階段「一哥」鹿島鹿角主場迎戰丙組仔FC琉球，兩軍實力可謂強弱懸殊，加上鹿角實在旺到冇朋友，自新帥石井正忠接手後連場報捷，腳頭勁好，預計今仗能速食弱旅FC琉球，半場主勝值博。

（周三晚6時開賽）

鹿島鹿角有幾旺？倒不如話中途上任嘅教頭石井正忠有幾好腳頭啦，自從佢於七月尾接替施里蘇掌舵後，就算面對射手甸尼爾及後衞晶子源受傷、另一前鋒達維缺態，佢哋照樣喺各項賽事錄得七勝一和不敗佳績，當中聯賽六連勝殺上榜首，日前於日聯盃又淘汰FC東京躋身四強，有時踢波嘅嘢，順起上嚟真係冇得解釋。相反，丙組第五嘅FC琉球，陣中只得有日職經驗嘅前鋒中山悟志較為出名，整體質素難與鹿角相提並論，況且鹿角嘅金崎夢生、赤崎秀平、遠藤康輪流發威，上半場KO丙組仔有何難呀？1.5倍嘅半場主勝係過關穩膽。
艾美利亞打沉艾爾切

至於西班牙盃第二圈，艾美利亞於主場對艾爾切，雖然兩軍都係新降班球隊，但上季排西甲十三位嘅艾爾切係因債務問題而冇得留低，非常唔抵，班波明顯受影響而一蹶不振。反觀艾美利亞知恥近乎勇，單計主場已經兩連勝，預計可輕取有後衞安祖阿朗素掛免戰牌嘅艾爾切晉級。最後智利盃十六強次回合，智利大學主場硬撼基路達，由於前者首回合落後1比3，為咗收復失地，今仗冇得諗要焗攻，佢哋近五仗轟入十二球，基路達作客又唔識守連開四鋪大，相信雙方會合演入球騷，大盤有計。