緬恩斯讓客攻無不「克」

猪拉多纳

武藤嘉紀信心爆棚

今季人氣最勁嘅亞洲球星，唔使問都知係武藤嘉紀啦！呢位日本前鋒終於喺德甲舞台開齋，德國《圖片報》仲以「緬恩斯新星誕生」嚟形容佢。武藤嘉紀個勢咁猛，梗係唔好畀佢停啦，今晚緬恩斯造訪頹爆嘅史浩克04，一於捧1.97倍「讓客」。

（now670台、有線61、64、201及203周日晚11:30直播）
拍車廠新廣告主題「挑戰」

武藤嘉紀呢期紅過炸子雞，佢幫日產汽車拍攝嘅新廣告已經出咗街，呢個廣告嘅主題係「挑戰」，真係同佢新球季嘅勇闖德甲之旅好鬼脗合。呢位日本新世代當家射手上輪德甲梅開二度，歐洲之旅終於開齋，兼且帶領緬恩斯以3球大炒漢諾威，就連前緬恩斯日本Icon岡崎慎司都話，睇好武藤嘉紀會喺德甲發光發亮。
史浩克連續兩場失分

呢邊廂緬恩斯喺德甲攞到兩連勝，相反今仗對手史浩克04就連續兩場喺聯賽失分，上仗造訪禾夫斯堡仲吞夠3蛋添，證明守將賀維迪斯、內田篤人同拿斯達錫受傷缺陣，對呢班波嘅防守力的確係有好大影響。

不過防守曳都未算最大鑊，最弊係近季史浩克中場靈魂達斯拿過咗檔去禾夫斯堡，取而代之係由拜仁慕尼黑以借用形式加盟嘅賀積查治，佢兩個無論戰鬥力同級數都冇得比，賀積查治根本未夠班頂達斯拿個位，咁快要佢孭重飛簡直係靠害。史浩克攻守實力受損，加上對上6次主場鬥緬恩斯只係錄得2勝2和2負完全冇着數，今鋪讓波點捧得落手呀？