紅魔強細搶芬

猪拉多纳

歐聯分組賽今夜正式開打，曼聯濶別一季強勢重返歐聯大舞台，頭炮作客荷甲燕豪芬（PSV），今季加盟「紅魔鬼」嘅荷蘭新星迪比倒戈成為焦點。紅魔剛同門將迪基亞續約，旋即係上一輪英超KO利物浦，士氣信心爆晒棚，強勢作客荷蘭，雖有朗尼缺陣，但仍然未驚過。PSV新一季被挖走多名主將，實力大大削弱，嚟到歐聯主場都要靠穩守，去屆歐洲賽佢哋主場6戰全開細，今場客勝同入球細都係咁好路。

（有線61及201台周三凌晨2時45分直播）
朗尼缺陣難大捷

曼聯重返歐聯抽到好籤，身處B組同禾夫斯堡、莫斯科中央陸軍同燕豪芬一組，同組最大對手係德甲實力份子禾夫斯堡，兩隊應可望攜手出線。不過，「紅魔鬼」喺英超暫時踢嚟未見霸氣，好難場場大勝。禾夫斯堡踢法成熟，擅踢整體戰，有力同曼聯爭做小組一哥。至於莫斯科中央陸軍及PSV實力較次，尤其係後者，預料將成陪跑分子。

「紅魔鬼」主帥尹戈爾之前執教荷蘭國家隊一手提拔新星迪比，今季終於由PSV簽下呢位愛將。迪比喺歐聯外圍賽附加賽首回合對布魯日梅開二度，盡顯身價，但今場倒戈成為焦點，對方實會盯緊佢，令呢位「新C朗」不易突圍。至於隊長朗尼有傷在身，今場難以上陣，亦成「紅魔鬼」一大隱憂，作客實在欠缺強攻本錢。不過，神龍迪基亞續約復任正選，加上基斯史摩寧同戴利白蘭特一對中堅愈夾愈熟，防守力予人信心，燕豪芬要攻破佢哋大門亦非易事，故預計曼聯呢場好大機會可以小勝收工，2倍客W值得捧場。
燕豪芬主場穩守

PSV去季於荷甲轟入92球，以無敵姿態奪冠，但季前失去迪比及韋拿杜姆兩大主力，球隊攻力大打折扣，即使主場出擊亦唔會谷得太前同曼聯鬥攻。

PSV去季參戰歐霸盃，6次主場出擊錄得3勝1和2負，勝出率只得5成，成績並唔突出。不過喺呢6場歐戰中入4球失3球，6場均開出入球細，反映佢哋喺歐洲賽主場出擊傾向保守，今次面對曼聯相信都會先求穩守，預期入球唔多，1.75倍細盤亦可兼投。