曼城強爆祖記

猪拉多纳

歐聯第一擊要立威

歐聯「死亡D組」重頭戲，曼城主場砌祖雲達斯！「藍月亮」曼城新季演出堪稱完美，英超5戰全勝兼不失球，呢支富豪球會一直渴求喺歐聯揚名立萬，建立國際品牌。難得取得華麗開局，當然要乘勝追擊。反觀，上屆歐聯亞軍祖記出閘脫腳，意甲開季3戰竟然未贏過，好大程度上因為人腳變動太大，仲未磨合好，遇上如日方中嘅曼城，睇怕都冇運行，簡單要曼城主W。

（有線64及203台周三凌晨2時45分直播）

曼城冇嘢多，就係錢多，今季重金收購史達寧、奇雲迪布尼及奧達文迪3大貴價貨，擺明要贏晒英超及歐聯冠軍。會方尤其重視歐聯，事關呢項賽事極具代表性，只有捧過盃，先至算係真正「班霸」，曼城唔止從未奪得歐聯，甚至近幾屆成績亦乏善可陳，一拍埋巴塞、皇馬、拜仁、曼聯，難免相影見絀。今屆捲土重來，頭炮當然唔衰得。

曼城踢得好順，英超5戰贏晒，包括大炒車仔3蛋，好有霸氣。雖然話史達寧、大衞施華、阿古路有傷在身，可能缺陣，但唔排除係煙霧。就算3人唔踢得，曼城仍然人強馬壯，奇雲迪布尼、耶耶托尼、韋菲特邦尼都係獨當一面球星，絕對夠殺。
祖記走晒樣連番失利

祖雲達斯自從派路、泰維斯、維達爾今夏離隊後，表現走晒樣，3場意甲只得1和2負，創下近47年最差開季成績，上仗如非博到12碼，可能都輸埋。以祖記級數，罕見連番失利，睇來問題非常嚴重。教練阿里基似乎已冇晒計，竟然話球隊上季成績太好，所以好大壓力，又指多位主力早前需應付國際賽，影響操練，諸多藉口。中堅邦路斯辣火頭，指摘球迷輸打贏要，並非真正球迷，連民心都失埋。祖記失晒方向，去到曼市等劏。