FC廣州--1掃雷

猪拉多纳

森巴兵團打晒骰

亞冠盃8強次回合，中超豪門FC廣州（廣州恒大淘寶）主場迎戰日職柏雷素爾，FC廣州首回合作客輕鬆贏3比1，晉級機會高唱入雲。柏雷素爾如果想晉級只得搶攻，但情況唔樂觀，因為雙方近5次對賽，FC廣州獲得4勝1和絕對優勢，柏雷素爾勉強壓前易被對手偷襲，隨時進退失據。FC廣州主Ｗ熱爆，備受莊家睇好，讓球主勝更值博。

（now 671周二晚8時直播）

2013年亞冠盃盟主FC廣州，勝在財雄勢大，會方今季投入更多資金爭標，包括聘請曾率領巴西奪得02年世界盃冠軍嘅名帥史高拉利執教，又重金簽入巴西國腳荷西保連奴，呢位中場首回合射入超遠罰球，技驚四座。陣中巴西射手列卡度高拉特仲犀利，現時以8個入球位居今屆賽事射手榜榜首，FC廣州嘅「森巴兵團」威力強大，柏雷素爾防線好難招架得住。
近4次贏晒柏雷素爾

事實上，FC廣州一向剋死柏雷素爾，兩隊歷來5次喺亞冠盃交手，FC廣州取得4勝1和，其中近4次對壘，全部由FC廣州勝出，而且都係淨贏兩球或以上，極具說服力。更何況FC廣州主場有埋地利，當然要贏到盡。

柏雷素爾首回合落後兩球，加上對手有3個作客入球在手，換言之柏軍最少要贏番3比1，先至可博加時。不過柏雷素爾想翻身相當困難，因為球員比較年輕，首回合有7位正選屬「90後」小將，大賽經驗同球星如雲嘅FC廣州有距離，踢逆境波肯定輸蝕，加上柏軍狀態麻麻，近5場比賽只有1勝1和3負，邊方面睇今場都注定要大敗一場。