白禮頓細盤好路唔怕追

猪拉多纳

今晚除歐聯外，同一時間仲有英冠快車，當中有場「頭尾之戰」，由榜首嘅白禮頓主場對包尾大幡洛達咸，白禮頓狀態弗爆，捧主勝之餘仲可以諗埋入球細，因為連埋上季白禮頓主場已連續10場開出入球細，認真好路！

（周三凌晨2時45分開賽）

白禮頓上年年尾委任「弱旅聖手」曉頓執教成功護級，今季開季反彈成功，6戰5勝以16分排緊榜首。56歲嘅曉頓08年展開領隊生涯，喺紐卡素做看守領隊開始，跟住09至10球季成功帶領「喜鵲」升上英超，跟住改教伯明翰，亦帶領球隊殺入歐霸盃分組賽，係球隊50年嚟首次參加歐戰，當季「阿伯」喺英冠最終排第4位，可惜喺升班附加賽輸波未能升班。曉頓嚟到白禮頓後改善防守，踢法唔悅目但勝在夠實際，令後防失球數字大減，今場對住榜尾洛達咸，但求全取3分鞏固榜首位置就夠！白禮頓喺聯賽3場主場都贏1比0，計埋上季連續10場主場開細，睇埋白禮頓上季兩鬥洛達咸又係開細，今場細盤不容錯過！
串查爾頓Ｗ保頓細

講多兩場英冠賽事畀大家過關，先係查爾頓主場對哈特斯菲爾德，查爾頓上場被一個爭議性入球打亂部署，搞到僅和洛達咸，今場面對兩連敗嘅哈軍，贏波唔難，始終查爾頓曾喺主場贏過侯城同昆士柏流浪，主勝值博。另一場保頓主場對錫周三，保頓上場2比1擊敗狼隊終於開齋，但球隊過去3次主場對錫周三都贏唔到，兼且開細，都係捧番細盤穩陣。