恒大「讓主」穩陣

猪拉多纳

柏雷素爾無頭難翻身

一隊波冇咗個精神領袖一定唔掂，所以日職勁旅柏雷素爾今日喺亞冠盃8強次回合作客廣州恒大淘寶（足智彩譯FC廣州）好難有運行，唔使諗喇，一於博恒大２倍「讓球主勝」啦！

（now671台周二晚8:00直播）
隊長大谷秀和或倦勤

唔睇好柏雷素爾翻到身，除咗佢哋首回合主場輸1:3，恒大有3個作客入波在手，柏軍至少要贏3:1先有得加時，今場波焗攻之外，最重要係佢哋近排冇咗隊長大谷秀和呢個精神領袖，自從呢件中場因為過勞倦勤，柏雷素爾近5戰就僅得1勝，喺日聯盃仲出埋局。而且翻查過往紀錄，兩年前柏雷素爾喺亞冠盃遇到恒大，大谷秀和兩回合都係養傷，結果慘敗1:8收場，今屆首回合冇佢又係輸波，久休嘅大谷仲未知會唔會夾硬出場，柏軍如果繼續無頭一啤蛇，唔死至奇。

2013年亞冠盃盟主恒大，上屆衞冕失敗後，招攬多件巴西猛將，包括森巴國腳荷西保連奴加強中場創造力，仲聘請埋名帥史高拉利領軍，當中射手列卡度高拉特，以8個入球高踞今屆射手榜榜首，艾傑臣又傷愈復出，攻擊力夠晒保證。早兩日恒大喺中超榜首大戰3:0打低上海上港，重奪「一哥」地位，家陣可以專心打亞冠盃，又點會放過柏雷素爾吖！

何況恒大根本就係柏雷素爾剋星，雙方歷來5次喺亞冠盃交鋒，恒大取得4勝1和，近4次對壘更加全部Win晒，今晚主場出擊實唔會留手啦。