拜仁征希臘大解放

猪拉多纳

歐聯F組首輪，希臘奧林比亞高斯主場對德國拜仁慕尼黑，拜仁實力高一皮，不過奧林比亞高斯喺歐聯主場比賽特別醒神，客Ｗ熱到1.31倍太過分，考慮到拜仁教練哥迪奧拿正受到各方圍插，歐聯比賽壓力極大，今場遇弱手必然搶攻，1.68倍大盤係較可靠選擇。

（有線63台周四凌晨2時45分直播）

拜仁係德國超級班霸，各方面對佢哋要求當然高，球隊喺德甲開咧四連勝，已經係教練哥迪奧拿上任第三季以來最好開局，不過累積兩季幾以來嘅軟弱表現，仍然遭受各方批評，連向來慎言嘅德國總理默克爾，都喺西班牙首相到訪時質疑哥帥係咪有資格教拜仁。球隊上仗靠球證同旁證一齊犯錯，至喺完場前博到一個唔應得嘅12碼，毫無說服力咁反勝奧格斯堡，賽後拜仁名宿夏文都喺電視台公開批評，話拜仁對哥帥太寛容，換咗其他人教一早應該炒咗。經過連續兩屆歐聯失敗後，哥帥都明白歐聯事關重大，若然今仗再行差踏錯，未來日子想清靜啲都幾難，唔到佢唔急。

拜仁今仗續有洛賓同列貝利缺陣，好在兩位頂級射手湯馬士梅拿同羅拔利雲度夫斯基都弗爆，對奧格斯堡時缺陣嘅馬里奧葛斯都可以復出，配合高效翼鋒杜格拉斯哥斯達，前線火力依然強橫，不過哥帥喺中堅缺人情況下都放走丹迪，搞到得番謝路美保定一個中堅可用，球隊今季聯賽連盃賽作客場場都有失波，今晚作客希臘都難保清白之身。
奧林比亞高斯弗爆駁火

奧林比亞高斯係上季希臘雙料冠軍，今季聯賽三戰全勝共轟入八球，狀態甚弗，球隊今夏換帥兼大換血，葡籍新帥馬高施華崇尚進攻，而且主場踢歐聯特別醒，近十三場歐聯主場比賽贏咗十場，包括擊敗馬德里體育會、祖雲達斯、曼聯、多蒙特仲有雙殺阿仙奴，今晚對住拜仁唔會龜縮，捧大盤啱數。