阿仙奴作客剪「布」

猪拉多纳

禾確特擔正夠醒神

歐聯今晚有好戲上演，F組阿仙奴作客薩格勒布戴拿模，同時亦係前鋒禾確特嘅正箭頭考牌戰。隨住隊友基奧特一次又一次發波瘟，令「禾仔」乘勢搶走兵工廠正前鋒機會大增，今晚再有表現機會佢梗係唔放過，有望帶挈大家贏波贏盤，撐2.3倍「讓客」。（有線64及203周四凌晨2:45直播）

由於主帥雲格偏愛基奧特，令禾確特多以翼鋒身份披甲。今夏呢位英格蘭前鋒傾續約嗰陣，講明要有更多機會出任箭頭位置先肯簽字。就連英國傳媒最近都幫佢造勢，指出「禾仔」近11次聯賽踢正選，夾埋有11球斬獲，表現一啲都唔失禮，加上基奧特失機頻頻，令雲格亦聽從民意安排佢擔任箭頭一職。
韋舒亞缺陣

難得有機會上位，呢位前鋒亦不負厚望，上仗鬥史篤城為球隊先開紀錄。賽後「禾仔」信心爆棚表示，話要繼續交出好表現畀大家睇。即使中場韋舒亞今仗要缺陣，但只要兵工廠仲有奧斯爾、辛迪卡索拉等較炮手源源不絕咁提供彈藥，「禾仔」唔愁冇「餐士」繼續開火。
薩格勒布近6次對英軍輸晒

至於對手薩格勒布戴拿模，事隔2年終於重返歐聯分組賽，理應值得高興。偏偏球隊患上「恐英症」，連續6次同英格蘭球隊交手錄得全敗紀錄，真係睇見都唔開胃。呢鋪佢哋仲有中場干卡路山度士停賽，咁搞法佢哋今晚仲唔凶多吉少？