熱刺卡尼仔「拉」定筋搶士哥

猪拉多纳

哈利卡尼新季英超仲未開齋，不過呢位「三獅神箭」一啲都唔擔心，仲預言入球即將來臨。今晚熱刺喺歐霸盃J組遇上同組最弱、嚟自阿塞拜疆嘅卡拉巴克，「卡尼仔」已經拉定筋，誓要證明自己唔係「一季射手」，1.72倍「讓主」要捧場！

（now670台周五凌晨3:05直播）
卡拉巴克舟車勞頓

上季喺各項賽事合共攻入31球嘅哈利卡尼，雖然喺歐國盃外圍賽已經有兩球進帳，但新季英超仲未有波入，呢位22歲射手賽前表示，自己嘅信心同狀態完全冇問題，自信好快打破球會級別嘅入球荒。熱刺領隊普捷天奴透露，今仗會安排拉美拿、湯卡路爾同迪利阿里等副選兵擔正，但點都會派哈利卡尼做正選，希望佢盡快入波。

老實講，今仗真係哈利卡尼嘅「士哥」良機，皆因對家卡拉巴克只係阿塞拜疆隊伍，好打有限。最重要係，卡拉巴克由首都巴庫飛赴倫敦，途程足足達4,000公里，係今晚歐霸賽事入面途程最長嘅作客球隊。舟車勞頓加埋實力輸一大截，點同剛啱喺英超敲響勝鼓嘅熱刺鍊呀？