頹爆利物浦難讓諾域治

猪拉多纳

利物浦近4戰不勝，今輪英超返到主場對諾域治，想反底唔容易。雖然佢哋有「好波之人」菲臘比古天奴坐完波監，今場重返正選行列，弊在班人最近愈踢愈頹，隊長佐敦軒達臣傷勢未愈，今場主讓平半，不如博諾域治2.05倍嘅「下盤」！

（now622台周日晚11:00直播）
紅軍戰將仲磨合緊

利記喺上周中歐霸盃以1:1賽和波爾多後，連續4場贏唔到波。雖然上場佢哋收起大部分主力，歐霸場波參考作用唔多大，但係班波狀態勁曳係鐵一般事實。「紅軍」近期攻擊力唔多掂，亦因為賓迪基、羅拔圖法明奴仲同緊隊友磨合緊。隊長佐敦軒達臣又養緊傷，占士米拿、菲臘比古天奴冇佢支撐大局，都踢得好辛苦。

另邊廂嘅「金絲雀」近期狀態唔錯，雖然開季連盃賽5場只係對過修咸頓1隊「硬嘢」，錄得3勝1和1負戰績十分「標青」。佢哋今場除咗前鋒加利賀柏、中場穆林保兩件傷兵外，其他戰將都可落場搏殺同紅軍鍊過。要全取3分唔係易，但要喺依家頹爆利記身上攞到1分，絕對唔係冇機會！