朗尼復出紅魔玩殘聖人

猪拉多纳

曼聯今個夏天漁翁撒網，領隊尹戈爾好似打《足球經理》咁，加里夫巴利、湯馬士梅拿乜都斟一餐，就連修咸頓個沙迪奧文尼都唔放過，擺明係對「紅魔鬼」鋒力唔多滿意，朗尼身為曼聯隊長兼主力射手，你估冇Hard Feeling咩！適逢「魔童」今晚傷愈復出，主帥尹戈爾仲激勵佢打破名宿卜比查爾頓嘅入球紀錄，加埋曼聯近7次造訪修咸頓嘅聖馬利球場未輸過，相信曼聯係時候反彈，一於捧2.22倍客W。

（now621台周日晚11:00直播）

朗尼已經跨季連續10場聯賽冇「士哥」，呢位隊長今仗傷愈復出，尹帥賽前話睇好佢可以喺退役前，超越名宿卜比查爾頓，成為曼聯史上「士哥王」。「魔童」喺曼聯累積攻入233球，僅落後卜比Sir（249球）同丹尼士羅（237球）排第3，依家風頭火勢都獲尹帥力撐，朗尼必定加多兩錢肉緊，打破入球荒回報尹帥嘅信任。
馬高斯盧祖踢爭氣波自救

要爭氣嘅仲有守將馬高斯盧祖，事關左閘勞基梳爾右腳骨折長抖，意味同尹帥不和嘅盧祖將獲解凍擔正，呢位阿根廷防線通天老倌，梗係要爭番啖氣證明實力啦！
修咸頓7次主場對賽輸6鋪

上季表現突出嘅修咸頓，開咧後只係贏過1場聯賽咁大把，右閘尼達利基尼同防中舒尼達尼離隊後，明顯係個沉重打擊，嚴重削弱實力。「聖人」雖然上季作客奧脫福球場贏過「紅魔」，但偏偏相反，佢哋近年喺聖馬利球場恭候曼聯都冇好下場，近7次交手僅錄1和6負劣績，撞正上周中歐聯輸波、急欲反彈嘅曼聯，肯定凶多吉少。