士砵亭超班炒爆國民隊

猪拉多纳

葡超今個星期壓軸戲有士砵亭出場，佢哋上周中雖然喺歐霸盃輸波，不過今晚主場迎戰低一班嘅國民隊，係時候贏波重振雄風。士砵亭今季改由名牌教練佐治捷西斯領軍，擺明想重奪聯賽冠軍，開季4戰3勝1和狀態上晒力，更何況有意大利中場阿古蘭尼壓陣，一於熱捧1.65倍「讓主」。

（有線155周二凌晨4:00直播）
士砵亭攻擊點夠多

士砵亭喺葡超一直屈居波圖、賓菲加陰影下，好彩佢哋今季撬走咗幫賓菲加連贏兩季聯賽冠軍嘅功勳教頭佐治捷西斯執教，目標就係染指聯賽冠軍。

雖然秘魯前鋒安達卡里路因合約問題畀球會雪藏，不過佐治捷西斯嘅戰術並唔係單靠某一、兩個球員，施利文尼、祖奧馬里奧、艾迪恩施華、卡度素文尼、阿古蘭尼都入過波，攻擊點咁多，對手可謂防不勝防。
國民隊近6戰交手不勝

另邊廂嘅國民隊今季兩仗作客都輸波，就連對住新升班嘅唐迪拉都輸0:1。睇番往績，佢哋過去6次作客士砵亭錄得2和4負，上季連盃賽4鬥士砵亭只係和1場，其餘3場都要捧蛋返屋企，今晚造訪里斯本難逃大敗。