拜仁復仇戰 讓主夠禾味

猪拉多纳

狼堡將帥決裂

德甲今晚上演重量級大戰，由上季聯賽冠軍拜仁主場迎戰上季亞軍禾夫斯堡。拜仁上季試過畀「狼堡」大炒4:1，今季德超盃又衰喺佢哋手上搞到捧唔到盃，新仇舊恨加埋，拜仁今晚點能夠唔還以顏色！再講「狼堡」呢排搞內訌，內憂外患一齊嚟呢鋪好難頂得住，1.65倍「讓主」唔好錯過。

（now670台、有線61及201台、中央5台周三凌晨2:00直播）

拜仁近年橫掃德甲，只有佢炒人冇人數到佢，點知班波喺上季歇冬後首戰，作客畀「狼堡」大炒4:1，隨即畀球迷笑到面黃。到咗今季佢哋又畀「狼堡」搶走德超盃落面，連續兩鑊都衰喺「狼堡」手上，今晚雙方再次交鋒，你叫呢支德甲班霸點可以唔報番一箭之仇先？
啤酒節打波 拜仁未輸過

事實上，拜仁失落德超盃之後，連同德盃、德甲同歐聯在內連贏7場，狀態冇得彈。加上哥帥上仗鬥達斯泰特刻意收起湯馬士梅拿、拿姆等主力，擺到明要喺今仗全力出擊攞彩，加上前鋒羅拔利雲度夫斯基復操，今場有望再度擔正搏殺，「破堡」架生齊晒唔在講，佢哋喺近5屆慕尼黑啤酒節舉行期間，征戰德甲特別醒神，1場都未輸過，撞啱今屆啤酒節開始咗冇耐，有埋呢項數據支持，絕對有力大勝一場。

何況禾夫斯堡最近發生將帥不和問題，主力射手巴斯杜斯喺上輪歐聯對莫斯科中央陸軍，唔滿意自己被換走發脾氣，之後練波嗰陣仲態度變差。主帥赫基隨即罰佢上仗對哈化柏林坐冷板，偏偏球隊最後要靠佢後備建功至贏到。
赫基巴斯杜斯面左左

不過赫基仍然口硬話唔保證佢一定有正選打，搞到內部氣氛勁僵，就算巴斯杜斯呢鋪擔正都未必肯出盡全力，加上上季大勝拜仁一役中同巴斯杜斯齊齊梅開二度嘅奇雲迪布尼已經轉投咗曼城，兩大功臣一個搞事一個離隊，「狼堡」今鋪憑乜嘢頂住矢志復仇嘅拜仁先！