紅牛保榜首半場破城

猪拉多纳

美職常規賽已進入尾聲，爭標及爭入季後賽形勢緊湊，紐約紅牛主場對奧蘭多城，各有所求。東岸一哥紅牛聯賽主場6連勝強勢，對常規賽冠軍寶座志在必得，奧蘭多城希望首季加入美職，就進身季後賽，但無奈球星卡卡有傷在身，恐怕抵擋唔住如日方中嘅紅牛，主W熱爆至1.35倍，可博紅牛1.8倍半場勝。

（TVB301周六早上7時直播）

紐約紅牛已穩奪季後賽資格，依家目標要贏常規賽冠軍，現時總積分表前8位只有3分距離，競爭非常激烈。雖然紅牛比部分球隊踢少1至2場，但優勢並唔多，若然稍有差池，隨時將冠軍拱手讓人，必須繼續搏殺。紅牛近6場聯賽主場全勝，當中5場上半場已領先，贏得好有說服力。射手巴利胡禮菲臘斯14個聯賽入球，有11球喺主場射入，今仗又係佢發威時候。
卡卡有傷奧蘭多城難靠

奧蘭多城落後東岸第6位蒙特利爾衝擊4分，兼踢多2場，已冇失分空間。球隊盡最後努力搶分，取得兩連勝，但對手實力較弱，包括僅以1比0險勝包尾嘅芝加哥火燄。最大鑊係巴西球星卡卡有傷在身，若缺少呢位美職最高薪球員壓陣，奧蘭多城頂唔住紅牛猛攻。