英冠倫敦打吡QPR劫富

猪拉多纳

今晚英冠獨腳戲，富咸主場對昆士柏流浪（QPR），睇開英超嘅朋友應該唔會對呢兩隊陌生，富咸畀前領隊「魔鬼教頭」馬加夫搞到元氣大傷，上季喺英冠都要為護級而戰；QPR班主費爾南德斯係富豪一名，隊波有錢買人，但今季都係要淪落到喺英冠踢。富咸三日前踢完英聯盃，體力輸蝕，平手盤要昆士柏流浪！

（TVB 301周六凌晨2時45分直播）

富咸同QPR都係倫敦球會，呢場倫敦打吡雖然比以往失色，但應該都一樣咁激，好似兩軍過去3次交手咁，有兩場都有球員紅牌被逐，所以話，死敵當前，雙方球員都會加多幾錢肉緊，呢個就係打吡戰好睇之處。

不過阿King就擔心富咸班球員今場想搏都係有心無力，周中先踢完英聯盃，輸畀史篤城出局，連埋上場英冠作客不敵錫周三，球隊連輸兩場，球員無論士氣定體力都低落。反觀QPR有王牌前鋒查理柯士甸腳風順，而且球隊近3場聯賽作客錄得2勝1和，表現不俗，今場可以秤先。
梅斯尼姆捱「細」界

阿King另外搵咗兩場法乙賽事畀大家過關，先有梅斯主場迎戰榜尾嘅尼姆。梅斯狀態下滑，連續兩場聯賽失分，搞到榜首位置畀迪安取代。尼姆雖然連盃賽作客5連敗，但輸波全部一球起、兩球止，5戰全開細，睇嚟今場交收唔會多，捧細盤仲啱數。另外一場係華倫西恩斯主場對杜亞斯，華倫西恩斯主場戰績仲差過作客，今季聯賽4次主場出擊都失分，相反杜亞斯5場作客都不敗，今場受讓當然博得過喇！