皇馬留力歐聯冇鑊氣

猪拉多纳

啱啱殺上西甲榜首嘅皇家馬德里，今晚喺主場迎戰今季未贏過波嘅馬拉加，牌面上當然係冇得比，不過「銀河艦隊」近期征戰頻頻，嚟緊又要應付歐聯賽事，對住專注死守嘅馬拉加未必可以大勝，讓兩球制唔過，捧馬拉加「讓客」啱數！

（now632台周日凌晨0:15直播）
馬拉加曾封殺「MSN」

皇馬今季4勝1和排榜首，不過占士洛迪古斯同加里夫巴利養傷之後，入波靠晒C朗拿度同賓施馬，遇啱C朗「上身」咪狂炒囉，但今季又試過0:0和希杭同1:0僅勝CF格蘭納達，既然C朗已經兩場食白果，加上嚟緊歐聯仲要作客馬模，今場似係「煲魚生粥」居多。

馬拉加開咧後2和3負排尾2，而且仲係1球波都未入過！最意想不到係佢哋亦只係失過3球（3場敗仗都係0:1），可見呢隊波只係識死守，佢哋之前作客魯營球場成功封殺巴塞隆拿「MSN」組合，今場照辦煮碗，皇馬想大炒有難度呀。