大宮福地開W保榜首

猪拉多纳

唔經唔覺，日乙只剩9輪賽事，原先lead成15分嘅大宮松鼠，經過8月中起hea踢一排之後，榜首優勢縮到得番10分，今日佢哋主場迎戰千葉市原，再唔可能玩玩吓，一於博大宮1.9倍主勝。

如果揸住個積分表玩波，今場都算係戲碼唔錯嘅搶分大戰，大宮積分優勢縮咗水，下星期又要作客出戰「二哥」磐田山葉，假如今場攞唔足3分，好可能畀磐田追番上嚟，呢場波焗住唔砌唔得。千葉家陣就排第7位，想入升班附加賽亦要搏盡，事關佢哋落後愛媛、綠茵只係2分。
千葉實力差半班波

咁嘅環境決定咗大宮、千葉都要去盡，雖則千葉响首循環主場贏過大宮2:0，以前大宮主場6戰千葉又得2勝2和2負，完全打成均勢，但係大家要記住一點，今場大宮係响NACK個場出戰，佢哋喺嗰度兩戰千葉係1勝1和未輸過，而且佢哋响日乙33戰入57球，只失22球，兩項數據都係聯賽No.1，千葉（入43球、失33球）同佢哋明顯差半班，冇理由唔揀福地出擊嘅大宮主W啫。