祖記主W冇甩拖

猪拉多纳

獎金刺激追殺西維爾

歐聯D組祖雲達斯主場迎戰西維爾，上屆亞軍祖記今季意甲成績大倒退，但踢歐聯又係另一回事，正如上輪被睇淡之下，作客擊敗同組最強對手曼城。莊家今場開出祖記讓半一，可見仍睇好呢支老牌勁旅。事實上，西維爾又唔係叻，今季作客未贏過，簡單要祖雲達斯1.8倍主W。

（有線62及202台周四凌晨2時45分直播）

祖雲達斯踢聯賽差，但轉戰歐聯又非常醒神，除咗因為歐聯獎金收入吸引之外，亦由於兩項賽事迫切性有好大分別。聯賽有三十八輪，即使失分都仲有大把時間追，但歐聯分組賽只有六場，而且對手都有一定級數，每場都係生死戰，自然迫使球員使出渾身解數爭勝。
阿里基求勝保飯碗

祖記人腳不俗，即使文迪蘇傑受傷，但另一位射手艾華路莫拉達一向喺歐聯有出色表現，上屆四強及決賽共轟入三球，上輪亦有入波射死曼城。新加盟嘅保羅戴巴拿有「新阿古路」之稱，質素毋須懷疑，祖記入波機會仍高。另外，教練阿里基急需以一場勝仗保帥位，今仗對佢而言猶如決賽，不容有失。

西維爾上季西甲排第五，以上屆歐霸盃冠軍身份參加歐聯，牌面被睇低一線。今季聯賽成績亦走晒樣，六戰得一勝兩和三負。球隊上輪歐聯主場贏慕遜加柏3比0，全靠球證幫手判罰兩球12碼，今次去到意大利比賽，好難再獲眷顧，再加上中場主力班尼加受傷，西維爾今仗更加惡唔出樣。