施華復出曼城「遜」得過

猪拉多纳

「死亡D組」今晚有好戲上演，德甲球隊慕遜加柏喺主場迎戰英超勁旅曼城。後者呢排雖然跌晒Watt，幸好中場靈魂大衞施華終可候命，搭住近期弗到爆嘅「標王」奇雲迪布尼組成雙核心，有望砌低唔識死嘅慕遜。曼城讓半一要2.15倍上盤。

\（有線64及203周四凌晨2:45直播）

曼城連續兩場英超輸波，上仗輸畀熱刺1:4場波更係損兵折將，中場耶耶托尼腿筋受傷可能要休戰3星期，對攻守能力都肯定有影響，但對住慕遜加柏，由費蘭度法蘭斯高夥拍費蘭甸奴鎮守中場中路，夠照啦！
慕遜加柏攻強守弱

最重要係門將赫特、隊長高柏尼同中場大衞施華今仗可以復出，當中連續缺陣咗3場波嘅「施華仔」，係曼城開季贏到開巷嘅功臣，有佢落番場派牌，夥拍加盟3戰已經有3球進帳嘅奇雲迪布尼，阿古路絕對唔愁冇供應。況且「藍月亮」首輪分組賽贏形勢但輸畀祖雲達斯，全隊上下實會吸取教訓。

主隊慕遜加柏自從由舒伯特擔任看守教頭之後脫胎換骨，連續兩輪德甲都贏波，睇落好似好醒，但睇清楚對手只係奧格斯堡同史特加，勝仗唔可以真正反映班波實力。

呢支德甲隊伍家陣重返勝軌肯定個個心雄，以格列沙加同拉菲爾基達奴為首嘅攻擊好手，定必想乘勇搶攻落曼城面。「藍月亮」最驚你唔攻，到時史達寧同阿古路打起反擊上嚟，攻強守弱嘅慕遜加柏真係入多幾球都唔夠輸！