曼城及時反彈 半場打殘紐卡素

猪拉多纳

剛喺周中歐聯贏咗慕遜加柏嘅曼城，今晚回師主場迎戰聯賽仍未開齋嘅紐卡素。「藍月亮」上周聯賽慘負熱刺1比4，但球隊迅即喺歐聯分組賽反彈，證明影響唔大。由於曼聯喺周日晚先至惡鬥阿仙奴，如果曼城今仗贏波即可暫時奪回「一哥」位，球員勢必搏盡，面對今季作客未贏過，攻不銳守不穩且近年聯賽對住「藍月亮」例冇運行嘅紐卡素，應可輕鬆取勝，阿謙睇好曼城半場就可以KO「喜鵲」，捧曼城半場勝。

（now 621周六晚10時直播）

曼城上周聯賽以1比4不敵熱刺，除球證多次誤判外，門將韋利卡巴尼路表現不穩亦係原因之一。「藍月亮」喺歐聯分組賽由赫特擔番正，結果憑其穩健演出助曼城贏波。曼城今仗雖然仍有後衞文加拉、高柏尼、基捷基治、中場戴爾夫、前鋒韋菲特邦尼同伊恩拿祖因傷缺陣，但奇雲迪布尼同阿古路近況甚弗，今仗要取得入球料非難事。值得一提係阿古路喺曼城近4次主場對紐卡素，其中3場都有波入，今仗特別項目嘅阿古路先入球值得一試。
喜鵲作客難招架

紐卡素開季表現未如理想，球隊上仗喺領先兩球下被車路士逼和，算係開季表現較好嘅一仗。不過，「喜鵲」防線嘅表現始終令人難以信服，開季7場聯賽失咗11球，面對一眾狀態甚勇嘅曼城前鋒，今仗要保住清白身絕非易事。「喜鵲」近年聯賽作客曼城都冇運行，近7次作客輸晒之餘，仲要有5次上半場就落後，可見面對「藍月亮」毫無還擊之力，今仗應該上半場已經頂唔住，捧曼城半場勝。