十字軍對撼 巴塞冇優「細」

猪拉多纳

西甲今晚上演「十字軍團對決」，由兩支傷兵滿營嘅球隊交鋒，西維爾主場對巴塞隆拿。雙方教練呢排勁頭痕，皆因傷兵名單幾乎有增冇減，安歷基直指傷患猶如笑話。另邊廂嘅西維爾直頭成績大跌，隨時成為教練艾美利嘅催命符。兩軍家吓各自煩惱，仲邊有心情駁火，轉玩2.2倍入球細好過。

（now632台晚上10:00直播）

受制於轉會禁令，巴塞新兵中場阿達杜倫等人要到出年1月先落得場，令球隊開季人腳已經唔算充裕。好衰唔衰，巴塞先有中場拉芬拿艾簡達拿受重傷，之後美斯、恩尼斯達陸續打柴，搞到兵源捉襟見肘。
西維爾7人打柴

對教練安歷基嚟講，依家最重要係唔好再有傷兵出現，相信一眾球員都唔敢去盡，發揮自然大打折扣。何況巴塞前線呢排得番蘇亞雷斯一個交到貨，另一前鋒尼馬至今入得嗰3粒腳風麻麻，好難再好似以前咁話數就數。

至於西維爾兵荒問題更嚴重，翼鋒卡古達、中場班尼加、中堅阿爾拉米等7人打柴，直接令球隊成績插水，聯賽6戰僅得1勝，咪話對教練艾美利帥位冇影響。而且班波連續4仗均失2球，今次惡鬥巴塞仲邊敢搶攻先？一隊怕傷唔敢搏，另一隊怕輸唔敢攻，入波好難多啫！