盧卡古打破入球荒 拖肥主勝萬「物」錯過

猪拉多纳

愛華頓今輪英超會同利物浦，上演默西賽德郡打吡。「拖肥糖」近期愈戰愈勇，近4戰3勝1和，相反利記表現繼續唔穩定，上輪英超贏完阿士東維拉3:2之後，喺歐霸對瑞士超球隊錫永又以1:1打和。對手近況唔多掂，愛華頓又有主場之利，2.48倍嘅主勝值得一試！

（now621台周日晚8:30直播）

愛華頓喺8月表現有啲慢熱，但係一踏入9月就成隊唔同晒。連埋盃賽，佢哋近4場贏3場，狀態相當唔錯。雖然佢哋仲有幾名傷兵，包括左閘巴尼斯，前線猛將米拿拉斯又要停賽，但射手盧卡古上輪對西布朗入波破7場入球荒，仲要一入就整兩粒，就知佢當弗啦。
紅軍多件主將養傷

相反利記就繼續大上大落，好唔容易先喺上輪英超險勝維拉，6場不勝後終於贏波，點知上場歐霸對錫永，全場控制戰局但係又畀對手逼和。佢哋依家仲有幾名主力，好似隊長佐敦軒達臣、前鋒賓迪基養緊傷，而且史杜列治復出冇耐狀態仲未足，想喺葛迪遜公園球場發圍就真係難啲囉。