馬主論戰

聪明的白痴

滙名燈夠照

　　我鍾意第六場「滙名燈」，在港頭兩仗贏晒，質素有幾高唔需要多講，上場初跑田草1200米排十四檔起步，結果響范義龍胯下全程走外叠，最後返嚟仍有一席第三已算隻馬叻。今次換柏寶操刀兼排二檔，肯定有唔同演出，可以放心捧場。

　　另一匹心水係頭場「威威」，近兩場加眼罩之後都上名，證明三歲馬並唔係全無戰鬥力之輩，今程跑1600米應該更加啱呢匹均速馬發揮，同場對手實力唔強，睇嚟都係時候贏番一仗。

梁廷鏘

喜綵出頭在望

　　今日我推介第五場「喜綵」，上次響田草1600米輸個鼻畀「飛躍之旅」得第二，真係有多少唔抵，不過都證明呢隻馬響四班的確好着數，今次再跑同程雖然都有唔少對手，但信賴蔡明紹嘅身手，應該可以替匹馬打開勝利之門。

　　另外一匹心水係第四場「越跑越有」，上場初出已經響田草1200米入Q，質素唔使懷疑。今季蔡廐質新馬增程嘅成績有目共睹，今次「越跑越有」增程跑1400米，肯定有好冇壞，值得作為今場重心看待。

張敬山

歡呼星增程掂

　　賀賢手馬好惡，我睇好佢有馬贏。先揀第九場「歡呼星」，近兩場加眼罩跑，陣上表現立即脫胎換骨，兩戰取得一冠一亞。四歲馬實力肯定未見盡，今次轉嚟跑田草1400米，應該更加啱佢發揮，用埋馬房好拍檔柏寶操刀，更添捧場信心。

　　另外重頭戲第八場經典一哩賽，賀賢派「喜勁飛」出戰，雖然今次要蝕分上陣，但睇番呢隻馬以往跑三次田草1600米全部贏晒，實力唔講得笑，如果今場早段有馬快放，隨時又可憑一條直路掃晒。

任達華