哥連泰斯保榜首大動干「戈」

猪拉多纳

國際賽檔期後，波友們又可以稍事休息，準備迎接周末重開嘅歐洲主流聯賽，但唔代表聽朝冇好嘢揀喎，巴甲榜首哥連泰斯會喺主場迎戰愈踢愈頹嘅戈亞斯。睇番哥連泰斯對上3次主場鬥戈亞斯，試過大數對手5:1同5:2，呢次讓半一又使乜怕先，1.72倍上盤咪走寶。

（開賽時間：周五早上6:30）
戈亞斯中堅打柴不設防

哥連泰斯暫時喺巴甲，以5分之差壓住明尼路穩坐榜首，為免夜長夢多，班波肯定力求贏波務求盡快搶得錦標。事實上，哥連泰斯主場夠晒惡，近12次聯賽主場出擊錄得11勝，加上中場謝臣近3仗入3粒Fit到爆，呢鋪對住作客4連敗嘅戈亞斯邊會咁易失手先？何況賽前球隊仲收到好消息，守將古希美亞雲拿、烏恩度爾、法格拿經已康復，就算中堅菲臘比蒙達里奧今仗停賽都冇有怕！

至於對手戈亞斯，自從踏入9月開始，球隊演出變得反覆難靠，最近5戰仲輸足4場，夾埋失咗9球咁多，防線認真牙煙。呢鋪佢哋仲要有中堅維爾馬盧卡斯打柴，好難旨意可以全身而退囉！