蜜蜂軍團大炒格

猪拉多纳

杜曹衣錦還鄉唔衰得

國際賽檔期完結，又係時候將注意力放番落聯賽身上，德甲今晚就整場「愛回家」戲碼畀大家睇，多蒙特主帥杜曹領軍造訪前東家緬恩斯。杜曹由09年開始教咗緬恩斯接近6年，分分鐘比現任教頭、教得1年未夠嘅舒密特仲清楚隊波，呢次莫講話3分，隨時大數一場都得，撐2.05倍「讓客」。

（now671、有線61及201周六凌晨2:30直播）

其實兩軍都幾有淵源，因為無論杜曹定還是多蒙特前任教練高普，同樣喺執教緬恩斯後，就應邀加盟多蒙特。喺知己知彼嘅情況下，唔怪得「蜜蜂軍團」近年都食住對手，近10次交手贏8鋪。呢鋪杜曹衣錦還鄉，點都要大勝一場騷哥利啦。
奧巴美揚弗到震

講風騷又點少得射手奧巴美揚先？呢位加蓬國腳今季腳風順到冇朋友，聯賽8戰都有進帳，夾埋入咗10粒。佢日前仲被德甲官方twitter大讚係世上最快飛人。數據顯示奧巴美揚30米衝刺只係要3.7秒就搞掂，就算正牌百米飛人保特喺09年創下9秒58嘅百米世界紀錄一戰入面，頭30米都要用3.78秒。連保特都贏埋咁威水，奧巴美揚今仗點都要數胡賀一賀啦。
緬恩斯遇強衰硬

話就話緬恩斯今季表現不過不失，暫時以12分守住聯賽第8位。不過呢班波遇強即投降，今季先後迎戰拜仁、利華古遜同史浩克04，統統輸波收場。今次仲要被對手摸通摸透，真係想唔輸鑊甘都難咯。