皇馬慢熱吼半場細 巴塞華歷簡奴大騷Encore

猪拉多纳

西甲兩大班霸皇家馬德里同巴塞隆拿今晚同於主場出擊，皇馬將會迎戰利雲特，球隊近期喺上半場比賽表現慢熱，已經連續六次半場開出細盤，面對啱啱喺西甲開齋嘅利雲特，相信上半場都唔易踢，一於捧半場細。

（now 632周六晚10時直播）

至於巴塞鬥華歷簡奴，雖然美斯受傷對攻力有影響，但巴塞近年主場對華歷簡奴都出現大手交易，大細轉3.5球照捧大盤。

（now 632周日凌晨2時30分直播）

皇馬喺上仗馬德里打吡雖與馬德里體育會打和1比1，但表現其實唔太差，球隊開季以嚟更未嘗一敗，只係和波太多先排喺第二位。皇馬前鋒賓施馬同中場莫迪歷同樣喺早前舉行嘅國際賽受傷，今仗應該踢唔到，後衞丹尼爾卡華積、比比及中場占士洛迪古斯等傷兵仍未復出，加上下周中歐聯分組賽將作客惡鬥法甲嘅巴黎聖日耳門，今仗未必咁易咬得入利雲特。
利雲特新勝頂得兩嘴

利雲特喺上輪聯賽擊敗維拉利爾成功「開齋」，球隊今仗雖有艾雲盧比斯、安祖杜積奴及華沙因傷唔砌得，但士氣如虹下相信都可以同皇馬喺上半場踢成均勢，加上皇馬近六仗皆開出半場細盤，今仗隨時又會出現呢個情況，捧有1.92倍嘅半場細。

巴塞上仗聯賽以1比2不敵西維爾，遭逢聯賽第二場敗仗，球隊自美斯缺陣後表現時好時壞，似乎仍在適應。巴塞中場恩尼斯達喺早前踢國際賽受傷無法上陣，加上後衞華美倫及中場拉芬拿艾簡達拿亦有傷唔出得，球隊陣容捉襟見肘，幸好蘇亞雷斯同尼馬都冇喺國際賽上陣，養精蓄銳下相信會交出好表現。

華歷簡奴上輪聯賽主場不敵貝迪斯遭逢聯賽兩連敗，球隊今仗有後衞安東尼奧艾美亞停賽，中場柏保路靴南迪斯有傷無法上陣，陣容都唔係太完整，加上兩軍近四次喺魯營球場交手都開出大盤，就算入球大細中位數轉到3.5球都照捧大盤。