馬體會追分盡炒艾斯坦拿

猪拉多纳

理應喺C組一枝獨秀嘅馬德里體育會，現以一勝一負戰績排緊小組第二位，今晚喺主場對住歐聯新丁艾斯坦拿，唔係唔炒番場呀？難得對住弱旅，馬體會「九月之星」費蘭度托利斯更要力爭取得個人為「床單兵團」正式比賽第一百個士哥，加埋大勇嘅基沙文，馬體會讓兩球都照捧呀！

（周四凌晨2時45分開賽）

已經三十有一嘅「費托」喺上月交出兩入波兼一助攻，成功當選馬體會九月最佳球員，西甲對伊巴一戰更取得其第九十九個馬體會入球，可惜跟住五場比賽都冇進帳，為馬體會入嘅第一百球遲遲未到手。
費托劍指第100球

今仗賽前「費托」接受訪問，大談重返母會馬體會十個月以來嘅感受，佢表示上季初嚟埗到，一直適應同學習中，嚟到今季佢同班隊友愈夾愈熟，更以前輩身份指導隊中年輕球員。「費托」雖然已經重拾唔到以前嗰種人見人怕嘅速度同射術，但往往都會喺緊要關頭交到貨，佢話歐聯對球會嚟講意義重大，今場佢識Do喎！

馬體會上場歐聯喺主場爆冷不敵賓菲加，係球隊近三季以嚟首次於歐戰主場輸波，搞到喺C組畀兩戰全勝嘅賓菲加以六分力壓。「床單軍團」今場有中場奧利華托利斯及前鋒韋圖上陣成疑，但三大鋒將基沙文、積臣馬天尼斯同「費托」皆隨時候命，潛質新星安祖哥利亞亦具威脅。哈薩克球隊艾斯坦拿今場有主力前鋒杜馬斯停賽，呢支歐聯新丁主場出戰都仲有啲機會頂到對手，但作客馬體會都係聽炒喇！
賓菲加穩陣波吼細

C組另一場賽事加拉塔沙雷主場迎戰賓菲加，加軍有中前場布拉卡爾馬斯、咸美艾天托普及普多斯基因傷上陣成疑；賓菲加嚟到對手嘅「地獄主場」料會穩陣行先，今場唔慌多波入，細盤值捧。