(六)32 切爾達 vs 皇家馬德里 神奇切爾達頂得住皇馬

猪拉多纳

今晚西甲榜首大戰由「稀客」切爾達主場迎戰皇家馬德里，切爾達今季變身「巨人殺手」，贏過西維爾、巴塞隆拿及維拉利爾，今仗面對缺少「雙B」加里夫巴利同賓施馬嘅皇馬，受讓捧讓球主勝。

（now 632周六晚10時直播）

相信冇乜球迷估到西甲開季8輪，切爾達竟可同皇馬睇齊，成為僅存兩支不敗之師。呢支「神奇球隊」最令人驚喜係對住強隊表現特別醒神，包括上月主場4比1大炒巴塞隆拿。切爾達上年由前阿根廷國腳比利素執教後，成績有明顯改善，皆因佢球員時代踢過切爾達4年，對球隊文化非常熟悉，自然事半功倍。
失意兵團對強隊必砌

切爾達人腳唔差，首席射手洛尼圖效力過巴塞；伊亞高艾斯巴斯及約翰古達迪就踢過利物浦同曼城。呢班有質素球員以往未獲豪門重用，依家有得發揮自然更珍惜上陣機會，難怪每次鬥強隊都特別賣力。

皇馬受傷兵問題困擾，加里夫巴利、賓施馬及占士洛迪古斯繼續養傷，C朗腳風又唔順，近5場西甲入得1粒，加上經過歐聯大戰後，皇馬體力消耗好大，讓唔起以逸待勞嘅切爾達。