天鵝平手盤趁早買

猪拉多纳

近3對碰贏晒維拉

同大戶集多方資料作出分析而買波一樣，肥叔亦有就各大聯賽嘅球隊近年嘅數據，定出一些評級指數。今晚重心推介場次，係英超阿士東維拉主場對史雲斯，雖然兩軍近況均欠佳，但「天鵝」近年明顯食住維拉，仲有平手盤咁筍，真係有買趁早。

（now 623周六晚10時直播）

有睇開呢個專欄嘅讀者，都知道肥叔經常引用評級指數為大家貼波，好似熱拿亞主強客弱、薩斯索羅受讓捧及讓波反嘅特性，統統都係經由多年來累積嘅數據而客觀定出。史雲斯被喻為「英超巴塞」，主要原因係佢哋着重控球打法，雖然控球多唔代表一定贏，但能主導比賽總比捱打好，而且呢種打法，對住粗枝大葉嘅球隊特別有計，維拉正正係嗰種用波能力麻麻嘅球隊，加上呢支老牌球隊近年季初慣性腳軟，唔到護級生死關頭都唔發力，亦令佢哋逢季初嘅評級指數都偏低。
漢諾威平手盤露手影

睇埋雙方近5次交手成績，史雲斯錄得3勝2和未輸過佳績，近3次更加係全勝，擺明格食格喇，查實兩軍近況都差，維拉近5仗聯賽輸晒，史雲斯近5仗聯賽亦未嘗一勝，不過初盤開出平手盤之餘，作客嘅「天鵝」被壓到只得八水咁低，同出面嘅菠菜公司如出一轍，跟足大市，肥叔認為史雲斯今仗係坐和望贏格局，呢個平手盤快啲入貨。

至於德甲漢諾威主場對法蘭克福，漢諾威連贏兩仗從谷底反彈，「法福」就連續5場不勝，近5次交手漢諾威未輸過，睇埋主客和賠率，漢軍主W被質低到2.32倍，比其他菠菜公司如威廉希爾、立X及明陞更低，似乎備受睇好，初盤仲有平手盤只得八一水，隨時愈賣愈熱，宜趁早吸納。

（有線63台周六晚9時30分直播）