高普想開齋有難度

猪拉多纳

利物浦新帥高普上任後兩連和，梗係想盡早開齋，但紅軍今晚主場撞正近況不俗嘅「聖人」修咸頓，睇嚟高普都係要等多陣！修咸頓今季英超作客未輸過，受讓值捧！

（now 621周一凌晨零時15分直播）

高普早前接手利物浦，外界對佢充滿期望，但紅軍中場拉爾拉拿好坦白，話高普並唔係神，球隊要改革成功唔係一朝一夕嘅事。的確喺傷兵滿營下，高普短時間內未必交到好成績，隊長佐敦軒達臣要抖到11月尾，前鋒丹尼艾格斯及左閘祖高美斯又重創要長抖，射手史杜列治繼續做「玻璃人」，最近再受膝傷困擾今場上陣成疑，雖然賓迪基同羅拔圖法明奴兩個好番出得，但狀態亦唔夠弗，利物浦攻力疲弱，上場對魯賓卡山人多打人少都攻極唔入，今場好難贏到修咸頓。
修咸頓今季作客未輸過

修咸頓近幾季狂賣主力，不過球隊實力並冇削弱，皆因「聖人」眼光好準，好似買入嘅加斯安奴柏利、沙迪奧文尼、杜辛泰迪治等個個交到貨。

修咸頓近4場錄得3勝1和佳績，當中包括聯賽作客3比1擊敗車路士，近況及士氣都高過利物浦，真係唔知紅軍憑咩讓波，撐今季英超作客不敗嘅修咸頓可全身而退。