巴塞傷疲困擾捱細界

猪拉多纳

西甲兩「巴」戰，巴塞隆拿主場對伊巴，講名氣同實力巴塞梗係贏晒，但伊巴呢支「蚊型球會」今季頻有佳作，8場聯賽僅1敗，打起信心同士氣。巴塞經歷歐聯緊密賽程，傷兵問題亦嚴重，炒唔起伊巴。入球大細中位數3.5球，寧願揀細盤。

（now 632周一凌晨1時15分直播）

巴塞美斯仍然養傷，上周中歐聯贏巴迪2比0又有中場沙治羅拔圖傷出，加上另一中場拉芬拿艾簡達拿長抖，教練安歷基手上人腳緊絀，唯有靠尼馬同蘇亞雷斯自己搵食，咁樣好易畀人嘜死。難怪安歷基近日提拔「南韓美斯」白勝浩參加一隊操練，但佢要明年1月先可以註冊，遠水難救近火。以大細中位數3.5球計算，巴塞近6次主戰有4次開細，入球細更值博。

伊巴今季演出神勇，8場聯賽獲3勝4和1負，唯一敗仗都只係輸畀馬體會0比2，今仗鬥巴塞未必會大敗。
法國總理撐巴塞踢法甲

另外有傳如果加泰羅尼亞地區脫離西班牙獨立，巴塞就會被禠奪西甲資格，或會轉戰法甲，法國總理瓦爾斯開腔，表明歡迎巴塞加入法甲。瓦爾斯喺巴塞隆拿出世亦係「巴粉」，難怪咁積極開方便之門。