巴塞讓主「伊」絲執

猪拉多纳

尼馬弗爆 小白復出

好多人都擔心巴塞隆拿冇咗美斯仲掂唔掂，但隨住呢支西甲班霸喺聯賽同歐聯戰場連環奏捷，證明「地上最強」已經捱過呢段過渡期，重返正軌。今晚巴塞喺主場恭候伊巴，有狀態大勇嘅尼馬孭飛攻堅，加埋恩尼斯達傷愈復出，要打破伊巴嘅客場不敗身話咁易，1.8倍「-2」嘅「讓球主勝」捧得過吖！

（now632台周一凌晨1:15直播）
法總理邀巴塞踢法甲

最近咪有消息話一旦加泰羅尼亞地區脫離西班牙獨立嘅話，西甲有可能唔受巴塞玩嘅，尋日法國總理瓦爾斯話歡迎巴塞加入法甲，仲指摩納哥已有先例可循喎，證明「地上最強」係幾受歡迎。

講番波吖，雖然佢哋有美斯、拉芬拿艾簡達拿同沙治羅拔圖都養傷，不過主帥安歷基終於收到個好消息，就係恩尼斯達喺上周四重新投入操練，腿筋傷患已經好番晒，有「小白」喺中場「主持大局」，巴塞組織攻勢肯定更加有板有眼。況且尼馬近3仗足足轟入5球，由佢夥拍蘇亞雷斯同第2度榮升Daddy嘅拿傑迪錫攻堅，唔使愁冇波入。
伊巴作客未受考驗

巴斯克蚊型球隊伊巴新季脫胎換骨，上季掹車邊護級成功嘅佢哋，今季喺新帥文迪利巴率領下只係輸過1場，作客4戰更加未輸過。聽落好似好堅，但留意番伊巴4場作客對手，分別係CF格蘭納達、馬拉加、利雲特同拉斯彭馬斯，真正考驗真係冇乜。而且伊巴今季西甲唯一敗仗，就係輸畀馬德里體育會，證明佢哋一撞正實力分子就見晒底。況且伊巴傷兵都唔少，家陣有中場阿祖安干沙利斯、守將安東尼奧隆拿同拉米斯養緊傷，去到魯營都係等劏o架啦！