車路士搵史篤城出氣

猪拉多纳

「寸王」保帥位盃仔照砌

一場小小嘅英聯盃賽事，對於依家嘅車路士嚟講，一啲都唔小呀！英聯盃第4圈賽事，史篤城主場迎戰衞冕嘅車路士，究竟「寸王」今鋪會唔會又一次「仆倒在街上」呢，真係令人期待！不過科娜就覺得「寸王」今場可以吊住鹽水，帶領車仔擊敗史篤城晉級，始終車仔對上4次對住史軍全勝，客勝值得捧場。

（周三凌晨3時45分開賽）

英超車路士又輸一場，車仔周末作客韋斯咸輸1比2一戰，其實車仔呢場踢得唔錯，一改以往慢熱作風，不過好似「金句王」Peter黃話齋「好運好過好波」，「藍戰士」真係黑到世界盡頭，先有葛特蘇馬頭槌未過晒白界唔判入，法比加斯嘅入波又被球證枉判越位，莫連奴同尼曼查馬迪更做埋「紅牌阿姑」，輸波真係整定嘅。

莫連奴今季帶領車仔喺聯賽10戰後僅得11分，仲衰過「足球天才」莫耶斯，後者當年執教曼聯10戰都有17分，「寸王」依家畀英國天空菠菜列為英超領隊被炒大熱，不過人通常喺臨死前都會有回 光反照嘅現象，今場聯賽盃對史篤城就有望反彈贏波。
史篤城對戰4連敗

史篤城連贏4場後，上仗英超竟然喺主場吞屈福特兩蛋，表現不濟，其中後衞謝夫甘馬倫喺開波初段傷出，頂替佢嘅馬克威爾遜犯下致命大錯，搞到曉士第100次帶領史軍冇得贏波慶祝。防守穩健嘅謝夫甘馬倫今場肯定缺陣，曉士都幾頭痕，馬克威爾遜犯錯後信心下跌；隊長梳爾哥斯有望復出，但佢大傷剛愈，狀態肯定唔好得去邊；西班牙籍中堅蒙尼沙則略嫌幼嫩，經驗不足。曉士無論搵邊個落場，後防都係不穩，加上史篤城過去4次對車仔全敗，車仔今場破釜沉舟，客勝博得過！