禾夫斯堡大報復

猪拉多纳

盃賽次圈撞正仇家拜仁

德國盃第2圈，慕尼黑雙雄分途出擊，拜仁慕尼黑作客對禾夫斯堡，1860慕尼黑客戰緬恩斯！矚目之戰當然係「決賽戲碼」、上屆冠軍禾夫斯堡迎戰拜仁，禾堡已走出低潮，連贏3場，再遇仇家，當然要趁強勢展開大報復。拜仁傷兵問題已有改善，洛賓上仗復出即入波，羅拔利雲度夫斯基上月德甲曾轟入禾堡5球，當正「私房菜」咁食，預料又會係一場鬥攻入球騷，直取入球大。

（無綫翡翠台、TVB13周三凌晨3時30分直播）

禾夫斯堡今季因為失去兩位進攻主力奇雲迪布尼、比列錫，演出一度走樣，包括上月作客以1比5慘敗於拜仁腳下。不過，禾堡已經復甦，聯賽兩連勝之餘，歐聯亦擊敗燕豪芬。一對箭頭巴斯杜斯、麥斯古斯弗爆，前者上季德甲轟入16球，今季亦已有6球進帳。由慕遜加柏來投嘅麥斯古斯，近3場賽事入4球，呢對進攻組合火力，唔會差得過拜仁，唔需要擔心冇波入。問題係禾堡防線麻麻，中堅丹迪係拜仁棄將，經常有甩漏，恐怕招架唔住一班舊隊友。

拜仁慕尼黑喺聯賽10戰全勝，並破紀錄累積1000場德甲勝仗，氣勢一時無兩。好事成雙，洛賓已復出，並迅速重拾狀態。加上羅拔利雲度夫斯基、湯馬士梅拿狂數胡，而兩個新兵杜格拉斯哥斯達、維達爾表現亦對辦，中前場有人滿之患，難怪馬里奧葛斯、列貝利養傷，對球隊毫無影響。拜仁一向重視德國盃，過去4屆有3屆打入決賽，遇到爭標勁敵禾夫斯堡，應會以強陣爭勝。
近7對賽4開總入球5+

雙方近7次對賽，竟然有4次總入球達5球或以上，其中拜仁有2次大炒對手6比1，加上今季聯賽贏5比1，非常誇張，相信今仗又會有大把入波鏡頭出現。