狼堡 拜仁入波「大」放送

猪拉多纳

兩隊射手弗到爆

今晚德國盃次圈爆發重頭戲，由禾夫斯堡喺主場硬撼拜仁慕尼黑。雙方上個月尾喺德甲碰頭，相信大家都仲記憶猶新，皆因羅拔利雲度夫斯基喺9分鐘內連入5粒，為拜仁大屠殺禾夫斯堡，家陣「狼堡」以德盃衞冕身份返到主場肯定想報仇。拜仁有「羅拔仔」數胡，禾夫斯堡亦有「地頭蟲」巴斯杜斯攻堅，呢場大戰梗係要捧1.47倍入球大啦！

（無綫翡翠台及TVB13周三凌晨3:30直播）

呢期德國球壇風頭躉，唔使問都知係拜仁！呢支班霸剛啱大炒完科隆，錄得球會史上第1,000場德甲勝利之餘，開季10場聯賽仲全部贏晒，家陣勢如破竹，國內真係唔知有邊隊波頂得住佢哋。德國盃次圈展開之前，陣中翼鋒洛賓向傳媒話，會當今場波係歐聯咁踢，鬥志旺盛。
洛賓復出即有士哥

查實拜仁開季表現咁Sharp醒，湯馬士梅拿同羅拔利雲度夫斯基最大功勞，呢對「數胡孖寶」迄今喺各項賽事已合力轟入28球，堅到無倫。當中「羅拔仔」更加係禾夫斯堡剋星，上個月德甲佢9分鐘內連入5球，協助拜仁以5:1屠殺「狼堡」，加埋「小飛俠」洛賓上周六復出後已即刻有波入，呢個攻擊鐵三角都咪話唔得人驚。
禾夫斯堡報仇心切

上屆德盃盟主禾夫斯堡，經歷咗拜仁「噩夢9分鐘」之後，最近已經重返正軌，喺聯賽同歐聯兩條戰線連贏3場，3場入面喪入4球嘅麥斯古斯固然腳風順，但荷蘭箭頭巴斯杜斯都一樣咁勁。呢位仁兄專喺自己地頭發威，禾夫斯堡近6場主場賽事入面，佢有5場都「士哥」，由巴斯杜斯夥拍麥斯古斯攻堅，再加達斯拿穿針引線，力圖報仇雪恨嘅「狼堡」怨氣肯定好重，唔慌踢得保守。睇埋往績，雙方近5次交手有4次開大，兩軍射手呢期又Fit到爆，入波點會少吖！