重金屬利物浦 炸散般尼茅夫

猪拉多纳

空霸賓迪基歸位

自言鍾意踢「重金屬足球」嘅高普，執教利物浦之後連和3場，睇嚟仲未調校好音色。不過高普又唔使愁嘅，皆因新一代空中霸王賓迪基已經準備就緒！重金屬同空霸大玩Crossover，真係聽見都醒神。今晚利物浦喺英格蘭聯賽盃16強主場對般尼茅夫，係時候打開勝利之門，直取讓一球嘅1.7倍上盤。

（TVB302周四凌晨3:45直播）

高普喺今個月初接掌紅軍帥印後，踢咗3場比賽都仲未開齋，頭上光環逐漸褪色，再唔發力好快會失去支持。不過呢位德國主帥仍然信心十足，上仗賽和修咸頓後表明贏唔到唔係世界末日，言談間又暗示會喺今場波作出改變，誓要取得首勝咁話。
賓迪基頭槌建功冠絕英超

眼見球隊有副隊長占士米拿停賽，點解高普仲可以咁口響？因為射手賓迪基準備好歸位囉。呢位傷愈後連續2場後備上陣嘅比利時國腳，成功喺上場打破入球荒，證明自己狀態返晒嚟，有力搶走小將奧歷治嘅正選位置，解決火力不足嘅問題。

事實上，賓迪基可以話係新一代英超空中霸王。計埋上場球士哥，呢位前鋒自2012/13賽季起，一共喺聯賽頂入14球冠絕英超，絕對係破鐵桶陣嘅利器，加埋已經復出嘅翼鋒羅拔圖法明奴，紅軍呢鋪準備好炸散對手都得咯。
般尼茅夫主力打晒柴

更何況對手般尼茅夫近況曳到爆，連續5場不勝之餘，最近2仗仲要分別畀曼城同熱刺大數5:1，嚴重打擊球員信心。

唔止咁，呢支南部球會仲黑仔到有主力前鋒哥林威爾遜、中場麥斯格拉度、守將湯美艾菲克打柴，令兵源不足嘅佢哋實力大跌，連累球隊聯賽排名滑落至17位，身陷護級漩渦之中。咁搞法佢哋今晚仲邊得閒分心爭盃仔吖，不如早啲出局專心踢好聯賽好過。