萬人撐米堡讓客有着數

猪拉多纳

紅魔出副選爭盃

米杜士堡今晚喺英聯盃16強作客出戰曼聯，將會帶住破球會紀錄嘅萬人打氣團踩入奧脫福，對住半力出擊嘅「紅魔鬼」有望偷雞，今場波一於敲2.88倍「讓球客勝」。

（TVB301周四凌晨4:00直播）

英格蘭盃賽出名係爆冷溫床，米堡上季已經試過喺足總盃第4圈淘汰曼城出局，證明佢哋有能力做「巨人殺手」。呢支英冠球隊早排喺各項賽事錄得6連勝，雖然一度陷入低潮，但上輪聯賽就大勝狼隊3:1重返勝軌，就連西班牙籍領隊卡蘭卡賽前都話，冇嘢係冇可能，似乎已經拉定筋準備打大鱷。
路爾斯華倫西亞受傷

呢場波備受注目，曼聯兩星期前開售波飛，轉頭已經畀米堡球迷認購晒8,600張客場配額門票，「紅魔鬼」於是畀多1,450張配額波飛佢哋，預期話咁快又會售罄，今晚米堡將會破球會紀錄有1萬Fans隨隊作客。唔單止咁，米堡仲會喺自己個河畔球場搞直播，呢鋪有「萬人應援團」打氣，聲勢夠晒浩大。

曼聯剛啱喺英超悶和曼城，右翼衞路爾斯華倫西亞勇戰受傷，達美安今晚會頂佢個位。據英媒揣測，曼聯領隊尹戈爾計劃畀大部分喺「曼市打吡」擔正嘅球員抖吓，預期卡域克、費蘭尼同迪比等會正選落場，肯定唔係最強陣容。反觀英冠嘅米堡當正今鋪決賽咁踢，前英格蘭國腳紐根特同達寧都會披甲，鬥心十足，要締造爆冷戰果唔係冇機。