森多利亞上盤安心捧

猪拉多纳

今輪意甲快車得番1場獨腳戲，由森多利亞今晚喺自己地頭恭候安玻里。森多利亞今季主場出擊表現穩陣，加上上輪大勝一仗中止球隊3場不勝紀錄，士氣急升。呢次對住作客成績麻麻嘅安玻里有力全取3分，呢鋪「森多」小讓平半，不妨直取1.98倍上盤。

（TVB301周五凌晨3:45直播）

森多利亞今季喺主場出戰聯賽表現夠穩定，當中包括試過砌低羅馬，並曾摸和過國際米蘭，合共錄得4勝1和不敗佳績。上場班波更一洗3戰不勝頹風，主場以4:1大數維羅納，就連首席射手艾達馬田斯都成功打破入球荒，呢鋪再次喺鄉親父老面前獻技迎戰安玻里，當然值得秤先。
安玻里作客對賽4連敗

雖然對手安玻里上輪聯賽同樣贏波，不過佢哋每逢作客戰鬥力始終大打折扣。班波今季聯賽作客4戰輸3場，剩番1場就藉住踢多個優勢先贏到烏甸尼斯，實難予人信心。況且球隊連續4仗作客森多利亞皆敗北而回，呢次仲有守將烏路斯哥錫、達馬古打柴，想搶分似乎冇乜計囉。