馬體會食慣拉科要追

猪拉多纳

拉科魯尼亞今晚喺西甲主場對馬德里體育會，唔值得冷敲。雖然拉科喺新教練域陀領軍後，表現唔錯，不過馬體會教練施蒙尼已下令，要求陣中兩個射手積臣馬天尼斯同費蘭度托利斯，交出更多入球，大家知佢幾惡啦，邊個敢唔聽？相信「雙斯」可以帶挈馬體會繼續贏波！

（now632台周六凌晨3:30直播）
拉科魯尼亞防線不穩

現時拉科喺聯賽榜排第6位，對於首次以教頭身份領軍嘅域陀嚟講，可以話交足功課，而且佢球員時代曾經長時間效力拉科，高層同球迷實撐佢啦！可惜吖，其實拉科個後防唔多穩陣，要求佢哋對住硬淨到得人驚嘅馬體會身上搶分，真係幾難，特別係拉科近7次對賽得1和6負，點撐得過先？
施蒙尼下令前鋒鬥入波

另一方面，馬體會日前喺主場以2:1砌低華倫西亞，計埋歐聯在內連贏3場反彈，教練施蒙尼最近仲落柯打，下令積臣馬天尼斯同費蘭度托利斯要入波作出良性競爭，結果真係掂，積臣馬天尼斯已經連續兩場建功，如果費托唔想長坐冷板，梗係要趁馬體會食慣拉科呢個優良傳統，爭取入球證明實力啦！