羅馬崛起打謝悶蛋國米

猪拉多纳

今周意甲焦點大戰，國際米蘭主場對榜首羅馬，由於祖雲達斯大跌Watt，預料今季意甲冠軍寶座將會易主，羅馬最具冠軍相。呢支首都球隊人腳充裕，攻力強勁，有本錢可以喺聯賽「長途賽」保持水準。國米踢慣守勢波但效果一般，今場「矛盾之戰」，莊家開平手盤，捧踢法進取嘅羅馬贏面比較大。

（TVB 301周日凌晨3時45分直播）

羅馬今季增強人腳實力，羅致咗射手迪斯高、穆罕默德沙拿及門將施捷斯尼，陣容更完整。尤其係中前場進攻組合屬於意甲頂級，謝雲奴、比真歷、穆罕默德沙拿喺聯賽已各有五球進帳，仲有後上殺手費奧倫斯，攻擊板斧多元化，包括歐聯在內近七仗共轟入廿三球。

國際米蘭今季轉踢「悶蛋足球」，雖一度取得開季五連勝，但呢種消極戰術，失分機會亦好高；加上球員狀態走下坡，結果近五場意甲僅贏過下游弱隊博洛尼亞，當中對另一支前列球隊費倫天拿更大敗1比4，今仗遇上更強橫嘅羅馬，睇怕國米難逃一敗。