悉尼獅吼勢演駁火戰 榜首大激鬥

猪拉多纳

澳職榜首大戰，FC悉尼主場對布里斯班獅吼，上季常規賽及季後賽「雙料亞軍」FC悉尼今季捲土重來，簽入兩位東歐兵連高域、荷洛斯高，以及土炮射手麥西蒙等進攻球員，火力大增，取得3連勝，銳不可當。獅吼亦不遑多讓，4戰已轟入10球，成為今季聯賽首支入波達雙位數嘅球隊，要力爭一哥位置作客照攻，首選入球大。

（有線64及203台周五下午4時40分直播）
悉尼鋒線多尖刀

FC悉尼教練艾萊特踢前鋒出身，好注重中前場人腳配搭，今季羅致連高域、荷洛斯高、麥西蒙都擁有上乘射術，麥西蒙上仗更梅開二度，協助球隊以3比1擊敗中岸水手。唔好忘記陣中仲有新西蘭著名射手史美斯，呢位34歲老將曾於08/09及09/10年度，連續兩季奪得澳職神射手殊榮，佢上仗亦有1球進帳，證明寶刀未老。FC悉尼鋒線實力屬於澳職數一數二，爭勝本錢充裕，主場出擊必以3分為目標。
獅吼小將有料到

布里斯班獅吼今季由前樸茨茅夫射手艾萊斯執教後，亦大踢進攻足球，呢位39歲少帥重用新人，包括20歲新星班頓波里路。呢位小將一嗚驚人，4場聯賽已入4球，包括上仗梅開二度。另一位90後前鋒占美麥卡倫亦有3球進帳。初生之犢不畏虎，獅吼球員年輕有活力，踢得比較放。更何況今仗贏波就可搶走FC悉尼嘅榜首位置，獅吼肯定唔怕同對手駁火。