馬主論戰

纯情小彩迷

牛精金星贏得

　　  今日重頭戲第八場百年紀念瓶，我哋隻「衝鋒槍」都有份上陣，不過呢隻馬向來沙田表現唔及谷草，如果能夠跑近已經心滿意足喇﹗講番心水，鍾意第七場「牛精金星」，今季轉去東廐之後表現好準，四戰獲一冠兩季，上場已經證明1400米都啱，今次再跑此程應該贏得。

　　  另外鍾意第五場「呼風喚雨」，今季同樣表現好準，五戰獲一勝三位夠晒忠心，計實力響四班一啲都唔輸蝕，今場只要有正常步速，有望後上贏馬。

（梁廷鏘）

牛精金星科研精英開齋

  　　苗禮德近兩次賽事都有馬贏，今日一於繼續吼實佢啲馬，其中頭場「科研精英」就好啱心水。上場初出跑直路賽遇着質素甚高嘅「萬事佳」，能夠跑入第三已算本事，有過作戰經驗之後再上陣，應該有更進一步演出，開齋在望。

　　  另一匹心水係第二場「越跑越有」，初出已經響田草1200米同「好心星」串Q，質素唔使懷疑。上場增程跑1400米，缺乏路程經驗下跑第四，表現唔算失望，今次呢隻馬再跑同程，估計會有更理想表現。

（張敬山）

萬事佳質素高

  　　呢次賽事有唔少明星馬列陣，估計賽果未必會太冷。最鍾意第三場「萬事佳」，上場響直路賽一出即勝，姿態相當輕鬆，難怪賽後畀評磅員加咗九分，質高馬今次再跑贏馬路程，應該不勝無歸。

　　  另外第八場百年紀念瓶，最睇好摩廐「爆冷」，雖然呢隻馬已經八歲，但戰鬥力唔覺得有退化，計級數一定係全場最高，即使負頂磅上陣，一樣讓得起對手有餘。以往贏過1600米同2000米，1800米一定啱跑，可放心捧場。

（任達華）